هااااااااااى بنات ازيكوا؟؟ وحشتكوا ؟ انتوا وحشتونى أوى .. أنا جاية انهاردة و أنا فرحانة أوى أوى أوى الصراحة (طبعا بتريق)، أنا مصدومة فى نفسويتى جدااااااااا..

أنا قلتلكوا المرة اللى فاتت اننا خلاص حددنا معاد الفرح و كله تمام ة أنا عارفة انى يعتبر كدة مزنوقة (كمان 6 شهور) بس ماكنتش متخيلة انه للدرجة دى!!!!!! أنا صحابى كلهم كانوا بيعدوا يقولولى احجزى احتياطى و بتاع بس انا مش من النوع دة بصراحة. و خطيبى كمان حد عملى الى أقصى درجة فبالنسبة له دة خيال علمى. و كمان ماكنتش عايزة يبان انى مدلوقة أوى عالجواز كدة يعنى، بالذات ان انا الكبيرة اللى فى العيلة فمعندناش حد اتجوز قريب، أخر فرح كانت عمتى من 15 سنة!! فالعيلة عندى برضه مش مدركين الوضع بقى عامل ازاى و أد ايه الحجوزات بقت صعبة.

المهم يعنى، نزلنا نتفرج عالقاعات و أنا فاكرة بقى بنقى و براحتى. اتصدمتتتتتت!!! مبدئيا كدة تقريبا مافاضلش و لا خميس فاضى فى 2014 و طبعا الجمعة بقى وضعه صعب من ساعة الحظر، ماحدش ضامن برضه.و 8 و 9 على أخرهم. السنة مزنوقة جداااااااااااااااااا. رمضان واخد شهر 7 كله تقريبا. مافيش غير شهر 5 اللى هادى شوية عشان بيبقى على طول امتحانات.

بمناسبة الزنقة دى بقى قررت أعمل جدول لكل حاجة محتاجة أعملها و امتى و طبعا غيرت فيه معاد حجز القاعة من 6 شهور ل 8-10 شهور، علشان ماتتزنقوش زيى. يا رب يفيدكوا و أشوفكوا الاسبوع الجاى.

عروسة ومحتاسة - 1
عروسة ومحتاسة - 3