الموضوع النهارده مهم جدا وحساس اوي ويهم كل الشباب وخاصة المقبلين منهم علي الزواج...... اوعي دماغكم تكون راحت هنا ولا هنا اديني بقولكم اهو!! اكيد لاحظتوا ان مواضيع الاعراس دايما تركز على العروسة على ملابسها ، مكياجها، صحتها ، اعصابها و.و.والخ
زي ما العروسة لها نصائح النهارده هنتكلم عن العريس وهنقدم لك شويه نصائح عشان تكون احسن عريس واحسن زوج في الدنيا كلها احفظ ورايا
والنصائح دي تضامنا مع اخواننا المساكين المقبلين على الزواج

اولا: قبل الفرح باسبوع

1- حاول تشتري هدية بسيطة لزوجتك وتقدملها الهدية دي في اول يوم زواج عمرها ما هتنساها مهما كانت بسيطة بس هتبقي لفته شيك اوي منك وجميلة .

2- تجنب الحلاقة ابدا لمده اسبوع قبل الفرح .

3- شارك عروستك في ترتيب الملابس الخاصة بيك وبيها وفي فرش البيت بشكل عام جو مشاركة بيكون ذكريات تدوم للابد .

4- تأكد ان ادواتك الشخصية كلها موجوده زي فرشاه اسنان ، ماكينه الحلاقه ، عطوراتك ، ملابسك الخاصه واهتم بترتيب ملابسك الخاصة باول يوم لعرسك زي البيجاما و روب نوم فوق البجاما علشان الشياكة تكمل .

5- تأكد من الحجز عن الحلاق الخاص بيك وممكن قبل الفرح باسبوع تعمل حمام بخار وشويه ماسكات عشان وشك يطلع حلو في الصور مش منفخ .

يوم الفرح

1- تأكد من انك تاخد كفايتك من النوم وهدي بالك وريح ذهنك ، بعد ماتقوم خد لك شاور دافي وفكر في افكار حلوه ورايقه علشان ينعكس الروقان ده على وجهك وحاول تبعد نفسك عن اي مشاكل يوم الفرح علشان تتجنب التكشير والاتباك .

2- الغداء والعشاء يفضل يكون حاجه خفيفه عكس ما كل الناس متخيله ان المفروض العريس ياكل اكل كتير ده بيكون غلط وبيضر جدا لانه بيجيب لك حالة من الخمول العام الغداء المتوازن والغني بالعناصر المفيده (وطبعا كلكم فاهمين انا اقصد اي اكلات بالظبط) بتكون طول الاسبوع الي قبل الفرح يوم الفرح حاجات خفيفه .

3- استخدم البرفان الي بتحبه علشان تعطر بدلة فرحك ودي شويه اسامي برفانات حلوة اوي رجالي (هافن - هريريرا -كارتييه -شانيل -بوشيرون - س ت ديبون)

4- روح للحلاق في المعاد بتاعك

5- احرص كل الحرص علي استقبال عروستك بابتسامه هاديه وجميله ويفضل انك تقولها اجمل الكلمات لما تقرب منها دي بتكون ذكرة للعمر كله زي (انتي احلي واحده شفتها في حياتي – اخيرا بحقق حلمي - ........) وطبعا قبله علي الايد او الجبهة او الاثنين بتخليها تحس انها طايره بيك فاوعي تنساها دي احسن رسول يعبر عن حبك وسعادتك بيها .

6- طول الفرح احرص ان عينك تكون علي عروستك وتبادلوا احلي الكلمات والنظرات وافتكر دايما ان الفرح ده فرحتكم انتوا الاثنين يعني مش مهم الناس المهم انت وهي وبس حققوا الي طول عمركم بتحلموا بيه وافرحوا من قلبكم ده المهم خلي اليوم ده يوم مش ممكن يتنسي .

7- بمجرد دخول بيتكم حاول تحسسها بالامان ويكون دمك خفيف علشان تطمن اوعي تنسي ان مهما كنتوا قريبين اليوم ده هيكون اول يوم تكونوا فيه مع بعض ومقفول عليكم باب واحد عشان كدا خوفها وشعورها بالاحراج وحاول تخليها تتغلب علي الخوف ده وحسسها بالامان والارحه ببعض الجو المبهج في البيت.

8- اول حاجه تعملها ان كنت عريس مسلم ان تبدأ حياتك بالصلاه ركعتين وتدعي انت وزوجتك ربنا يبارك لكم في جوازكم ويجعل لكم ذريه صالحه
اما الزوج المسيحي فبعد فرش البيت والانتهاء من التجهيزات احرص علي صلاة الاب الكاهن في البيت لمباركة البيت والزواج كرباط مقدس لا ينفك ابدا ولا ينتهي .

نصائح عامة للزوج ناجح
1- من اهم الحاجات الي لازم تعرفها في الجواز انه مش مجرد شهوة وفقط الجواز حياة مسئولية مشاعر حب وغضب وبعد وقرب ايام وحلوة وايام صعبه لازم في كل الاوقات دي تكون جنب زوجتك ومش ممكن تنسي انها حبك الاول وام اولادك وتتفقوا ان انتوا تكونوا اصحاب قبل اي حاجه والصاحب مش ممكن يبعد عن صاحبه بالعكس لازم تكونوا جنب بعض في كل واي موقف .

2- احرص دائما انك تكون في قمه شياكتك ورونقك في بيتك خاصة ان زوجتك هتكون في ابهي وارقي واجمل صورة ليها فاحرص دائما علي تسريح شعرك والتعطر باجمل واشيك البرفنات خليها دائما تشوفك في البيت زي اول يوم شافتك فيه وتنبهر بيك كمان الاهمال في شكلك هيأدي الي الملل وبالتالي الي البعد بينكم .

3- شارك زوجتك في اعمال المنزل المشاركة من اهم الاشياء لنجاح الزواج وتعميق العلاقه بين الزوجين .

4- لا تهن زوجتك ابدا لاي سبب من الاسباب فالاهانه بالسب حاجه مش ممكن تنساها الزوجه وفيها جرح
لكرامتها خاصة لو بدأت تحقر منها او من شكلها دي هتكون نهاية حياتكم الزوجيه وبدايه اطفاء شراره الحب بينكم .

5- احسن معاملتها تحسن هي معاملتك حاول ان تتعامل مع زوجتك علي انها بنتك وعلمها طباعك واصبر عليها واعلم جيدا انها لم تخرج من بيت ابيها لكي تذل او تعامل معاملة غير طيبة او معاملة قاسية هي خرجت لانها تحبك وقررت تكمل حياتها معاك في بيتك فلها كل الاحترام والتقدير.

6- احرص علي تخصيص وقت للأطمئنان علي زوجتك ولسؤالها عن احوالها وعن ما مرت به خلال اليوم واستمع الي ادق التفاصيل التي تريد ان تحكيها .

7-تجنب ان ترجع الي بيتك عابس الوجه فكل ما تعانيه خلال اليوم اتركه خلف باب المنزل وادخل البيت بشوشا مشرقا مشتاق الي الراحه والامان في بيتك ومشتاق الي زوجتك .

8- حاول تخصيص وقت لممارسة هواية مفضله مشتركه بينك وبين زوجتك هذا يكسر اي روتين ويجدد العلاقه الزوجيه بينكم .

9-احرص علي وصفها باحب الاسماء الي قلبها واحب الصفات لها هذا يجعلها تحبك أكثر يوم بعد يوم .

10- لا تنتقدها امام الناس خاصة لو كانوا اهلك او اهلها ولا تتجاهلها او تتجاهل كلامها مهما كان بسيط هذا يجرحها اشد الجرح بالعكس حاول ان تشكر فيها وفي اكلها وشربها وشطارتها بس بلاش قدام مامتك كلنا عارفين الحته دي حساسه شويه (حماتها وكدا ) .

11-اياك ان تثير غيرة زوجتك كدا انت هتفتح النار علي نفسك ومش هتعيش يوم مستريح وهتخسر الثقه بينك وبينها وممكن ان تؤدي لفشل العلاقه الزوجيه بالعكس حاول تحسسها انها كل حياتك وانها عشقك الاول والاخير .
12- حاول ان تسيطر علي اعصابك وغضبك خاصة لو حصل اي موقف يستدي الغضب لا تجعل زوجتك تري او تسمع منك اسوأ الاشكال او الالفاظ حتي لا تكرهك .

13- امنح زوجتك الثقة بنفسها . لا تجعلها تابعة تدور في مجرتك وخادمة منفذة لأوامرك . بل شجعها على أن يكون لها كيانها وتفكيرها وقرارها . استشرها في كل أمورك ، وحاورها ولكن بالتي هي أحسن ، خذ بقرارها عندما تعلم أنه الأصوب ، وأخبرها بذلك وإن خالفتها الرأي فاصرفها إلى رأيك برفق ولباقة .

14- اذا شعرت ان زوجتك تشعر بالممل من القعده في البيت فترات طويلة لوحدها حاول التفكير في شئ يونسها ويملئ وحدتها ويشغل وقتها حتي توفر علي نفسك المشاكل الكثيرة التي تأتي من الملل والوحده .

15- أشعر زوجتك بأنها في مأمن من أي خطر ، وأنك لا يمكن أن تفرط فيها ، أو أن تنفصل عنها.

16- حاول توازن بين حبك لاهلك وحبك لاهل زوجتك لازم تتفقوا ان من يوم جوازكم انتوا الاثنين بقيتوا شخص واحد بكيان واحد فأهللك واهلها بقوا اهلكم انتوا الاثنين فالعلاقه لازم تكون متوازنه ومفيش تفضيل حد عن الثاني .

17- نجاح العلاقه الزوجيه تتمثل في الغاء ضمير واحد وهو (أنا) من يوم جوازكم بقيتوا احد مفيش انانيه او اعلاء حد عن الاخر انتوا الاثنين بتكملوا بعض .

وفي النهايه لازم تعرف ان مفيش حد كامل يعني انت مش كامل واكيد زوجتك مش هتكون كاملة واكيد هيكون عندها بعض المشاكل او العيوب الي هتكتشفها بعد الجواز تغاضي عنها و انساها متركزش علي العيوب لان محدش خالي حاول دايما تشوف المميزات والحاجات الحلوة الي هي بتقدمهالك واهتمامها بيك وببيتك وباطفالك .

ولا شك أن مسؤولية السعادة الزوجية تقع على الزوجين ، فلا بد من وجود المحبة بين الزوجين. وليس المقصود بالمحبة ذلك الشعور الأهوج الذي يلتهب فجأة وينطفئ فجأة ، إنما هو ذلك التوافق الروحي والإحساس العاطفي النبيل بين الزوجين.

بقلم " هاجر عيسى "