ازيكوا يا بنات؟ عاملين ايه؟؟؟ وصلتوا لايه فى تجهيزاتكوا؟ ربنا معانا كلنا.انا زي نا قلتلكوا جبت الفستان خلاص (الهم الاكبر هههههه) دلوقتى بقى فاضية اركز على الحاجات التانية زى الميك اب مثلا.. اهم حاجة فى الدنيا اصلا.
دلوقتى مع وجود الانترنت سهل أوى نتفرج على شغل كل واحد، اينعم الصور بتغير و مانعرفش ايه فوتوشوب و ايه حقيقى. بس برضه بيسهل كتير, ناخد فكرة حتى.

انا فتحت الموقع هنا, عملت عرض لكله فى صفحة واحدة, و طلعت صفحة كل واحد على فيسبوك و قعدت اتفرج عليهم. طبعا ماخلصتش فى ساعتين تلاتة و لا حتى فى يومين تلالتة. الاختيارات كتير اوى. دة العيب بقى فى النت, لما يبقى قدامك كل حاجة! زمان كانت العيلة كلها تعمل عند نفس الشخص، علشان هو دة الوحيد اللى يعرفوه. دلوقتى ممكن تجيبى أى حد من أى حتة، حتى لو محافظة تانية ( طبعا هيغلى عليكى السعر، بس لو تقدرى يبقى ممكن).

طبعا كلنا عارفين محمد الصغير، فى بقى محمد الصغير ميك اب اكاديمى، دى اللى ماسكها "شادى" انا فى رأيى احسن حد بيحط ميك اب فى مصر. و أعتقد أغلى واحد برضه! بس زى ما بيقولوا الغالى تمنه فيه. بجد بيعمل سحر. الميك اب بتاعه بيبقى رقيق جدا، و العين بتلمع كدة حاجة واااااو، و بيفضل طول اليوم زى ما هو. بجد رائع، أحلى عرايس شفتهم فى حياتى كان هو اللى حاطتلهم.

فى برضه سالى رشيد، ما بقلهاش كتير لكن بتتشهر بسرعة علشان ممتازة بصراحة، شغلها رقيق جدا و بتعرف تتعامل كويس أوى مع عيوب الوجه. مافيش واحدة بتطلع من عندها وحشة. دى صفحتها على موقعنا لو عايزين تتفرجوا http://www.alzefaf.com/ar/ar/1189 . بس أهم حاجة تلتزموا بطريقة الحجز و تأكدوا عليها.

اخر واحدة عجبتنى أوى كمان، دينا يونان. http://www.alzefaf.com/ar/ar/659 هى صغيرة أوى بس موهوبة بجد. و بتعرف تتعامل مع كل اشكال الوجه.

المهم انتوا تختاروا اللى على مزاجكوا، و ما تخالوش حد يأثر عليكوا. دة شكلك انتى فى اهم يوم فى حياتك. خدى وقتك و اتفرجى براحتك. و اسألى على كل التفاصيل علشان مايبقاش فيه مفاجات تضايقك يوم الفرح. و لو أى حد عنده سؤال، ابعتولى .

عروسة ومحتاسة - 8
عروسة ومحتاسة - 10