هااااااااااااى كل سنة و انتم طيبين. و يا رب 2014 تببى كلها سعادة و فرح. عاملين ايه فى التجهيزات? محتاسين زيى? يا رب لا. انا الضغط زاد اوى مع ان الوضع احسن و فى حاجات بتتنجز, لكن الوقت بقى قليل اوى. انا ماكنتش اعرف انى حد قلوق كدة بس دة الفرح يعنى ,اهم يوم فى حياتى, لازم يبقى تحفة.

عارفين احنا لازم نتعلم ايه? لازم نقرر اننا نتبسط فى الفرح. انا عارفة ان احنا بنجهز كل حاجة و بنحاول نعمل احسن حاجة. بس اكيد فى حاجة هتبوز. مش ممكن كل التفاصيل دى تتظبط. فلازم نبطل توتر شوية. جمال اليوم دة ان انتى و الراجل اللى بتحبيه هتبقوا واحد.

بمناسبة الجمال, كنت بدور على اماكن لشهر العسل و فى حاجات وهمتنى. انا بجد ماكنتش متخيلة ان فى مناطق حلوة كدة. طبعا احنا عارفين ان كله دلوقتى لو قرر يطلع برة مصر بيروح ماليزيا و تايلاند. لكن فى اماكن تانية مش مشهورة زييهم بس احلى بكتير. يعنى مثلا كنكون فى المكسيك, بحرها تحفة. جزيرة سيشل, دى الجنة على الارض. جزر الكنارى فى اسبانيا, روعة. طبعا دول اغلى شوية من العادى بس يعنى هو الواحد بيروح فى حياته كام شهر عسل.

طبعا برضه مش بقول انك تصرفى كل الفلوس على شهر العسل. يعنى لو خطيبك ميزانيته محدودة ماتفلسيهوش. ممكن تروحوا شرم الشيخ و تتبسطوا جدا. اهم حاجة انكوا مع بعض.

برضه ماتنسيش تعملى حساب لحاجة مهمة جدا, الجو. يعنى انا فرحى فى يونيو, عمرى ما هروح شرق اسيا فى موسم المطر, دى كارثة. و اسالى كمان على درجة الحرارة علشان تعرفى تقررى تاخدى معاكى ايه هدوم. حاجة تافهة زى دى ممكن تبوظلك الدنيا. لكن برضه اهم حاجة فى كل دة ان انتى تبقى مقررة تتبسطى لان دى ايام مش هتتعوض, لازم تبقى ذكرى حلوة.

عروسة ومحتاسة - 5
عروسة ومحتاسة - 7