الزفاف.كوم اول واكبر موقع مصرى يساعد كل عروسين على تحضير الفرح المثالى. كل ماتحتاجيه من نصائح حول الزفاف، موضة افراح 2014، مقدمى خدمات الافراح فى القاهرة والاسكندرية من كوافير، ماكياج، محلات فساتين ومجوهرات. ايضا قاعات الافراح وشركات السياحة لنساعدك على قضاء اجمل شهر عسل.
عروسة ومحتاسة - 5
ازيكوووووووووووووووووا ؟؟ ايه الأخبار؟؟ الاسبوع اللى فات كان بتاع الفستاااااااااااااااان .. بجد أحلى احساس فى الدنيا.. أصلا أول فستان أجربه و بعد ما البنت حطتلى الطرحة مامتى دمعت كدة. بتقوللى ايه دة بقيتى عروسة :) ماكانتش لسة واخدة بالها هههههههههههه
أنا أصلا كنت نازلة اتفرج أول مرة بس فيه أماكن طلع فيها ممكن أقيس من غير ما أخد معاد فجربت فى كام مكان كدة. المهم بقى انى لما قست غيرت رأيى فى الموديلات 180 درجة. أنا كل صحابى كانوا قايلينلى كدة بس أنا ماكنتش مصدقاهم أوى بصراحة، أنا دايما بابقى عاملة أبو العريف عامة و مش باخد أوى برأى حد. بس فى دى كان عندهم حق بصراحة. الموديل مش بيبان غير فى اللبس و بيختلف جدا من واحدة للتانية. أنا كنت نازلة ناوية أقيس بس اللى بوسط و منفوش، على أساس ان أنا جسمى أتخن شوية من تحت فمش هلبس واحد مجسم يبين دة أكتر. كانت صدمة عمرى فعلا لما قست واحد سمكة و كان تحفة، بجد كان أحلى واحد عليا!! أنا عمرى فى حياتى ما تخيلت انى ممكن البس فستان كدة. دة كمان كان مرفعنى!! بجد أنا لسة مش مصدقة نفسى. و الأغرب ان المنفوش ماكانش حلو عليا زى ما كنت متوقعة.
فيه كمان التايبيست دة برضه كان حلو أوى. قست واحد شبه بتاع دنيا سمير غانم، بس عليها كان أحلى الصراحة LOL ، الruffles دى مش حلوة عليا. بيقولوا ان الفستان بيعبر عن شخصية الواحدة، دة ماكانش أنا. مش عارفة ليه. مع انه كان عاجبنى أوى.
نصيحة منى، ما تعمليش زيى، انا كنت طول الوقت عمالة اتفرج على فساتين و فى دماغى انى هجيبه منفوش ولما نزلت و قست فعلا غيرت كل دة. قبل ما تنقى الشكل انزلى قيسى و اعرفى ايه اللى هيليق على جسمك و على شخصيتك، و بعدين اتفرجى علشان ماتجيش فى الأخر و تغيرى رأيك.
أشوفكوا الأسبوع الجاى بقى و مغامرة جديدة ;) و لو عندكوا أى اسئلة ابعتولىىىىىىىىىىىىىىىىىىى
.
