عروسة ومحتاسة - 3

هاااااااااااى عاملين ايه فى الساقعة اللى احنا فيها دى؟ أنا عن نفسى لابسة الدولاب كله و قاعدة جنب الدفاية ههههههههههههه مقضياها سحلب .. بالأداء دة هبقى دبة على اخر الاسبوع و انا اصلا مش ناقصة.. يبقى الاسبوع الجاى عالدايت انشاءالله LOL

الأسبوع دة هكلمكوا على مغامراتى فى حجز القاعة. زى ما قلتلكوا المرة اللى فاتت أنا فعلا اتأخرت جدا فى الحجز. بالنسبة للقاهرة مش أوى عشان فى اختيارات كتير بس احنا قررنا نعمل الفرح فى الاسكندرية مع ان هو (خطيبى) قاهراوى علشان هو مسافر دلوقتى و أنا اللى هجهز كل حاجة و أنا فى اسكندرية. كان هيبقى صعب أوى انى اقضيها بين هنا و هناك. زى ما انتوا شايفين احنا اصلا اتزنقنا فى الوقت جدااااااااااااااا. و الموضوع حوسة أوى بصراحة، مافيش مكان تحسى كله متفق عليه.

المهم يعنى الاختيارات فى اسكندرية أقل بكتير جدا. الفنادق الكبيرة تتعد على الصوابع يعنى، و القاعات اللى لوحدها برضه مش كتير. أنا قلتلكوا ان الفرح فى 6؟ الجو انشاءالله يبفى حلو، دى حاجة كانت فارقة معايا اوى، أنا مش عايزة الناس تدعى عليا بعد الفرح يعنى و برضه الميكب و شعرى ما يتبهدلوش. بس أنا مش هعمل الفرح فى مكان مفتوح كدة كدة علشان الخطوبة كانت كدة فهيبقى ملل أوى.

فقررت أعمل فى هيلتون جرين بلازا. القاعة كبيرة أوى و المدخل زى ما يكون قصر و السقف عالى جدا. شيك أوى. مشكلتى بس انهم هيغيروا ديكور القاعة بالكامل!!! يعنى انا ماعنديش فكرة هيبقى شكلها اية. أنا عارفة ان دى كارثة بالنسبة لحد محسوك زيى بس بصراحة مافيش حاجة تانى اقتنعت بيها. ادعولى تتطلع حلوة بقى عشان أنا خلاص حجزت. الميزة كمان ان أنا هبقى من أوائل اللى هيعملوا فيها بعد التجديد. فمحدش تقريبا هيبقى حضر فيها. دة عاجبنى أوى بصراحة، الناس أصلها خلاص زهقت من كل الأماكن.
قولولى مبروك بقى أخيرا حجزت. و عقبالكوا كلكوا.

عروسة ومحتاسة - 2
عروسة ومحتاسة - 4