حماتي قنبلة ذرية

من قبل الخطوبة والجواز وكلنا بنكون قلقانين من موضوع "الحماه" ام العريس و طبعا كلنا بنتمناها تكون هاديه وجميله وسهله التعامل معاها واكيد بنحلم انها في الخطوبه تبوسك وتجيب لك كمان خاتم ذهب ولا حاجه .... احلمي احلمي

لازم تراعي كام حاجه كدا ان موضوع الخاتم ده مجرد مظاهر لان دايما ام العريس بتتضايق ان في واحده بتشاركها حب ابنها علشان كدا بيبان عندها شويه غيرة من مراة الابن وده "طبيعي جدا" المهم الشطاره انك تعرفي تتعامل معاها وعلشان كدا هحاول اكتبلكم شويه نصائح يارب تساعدكم

1- اوعي تحسسيها انك رقم واحد

مهما حصل ومهما كنتي متأكده من حب جوزك ليكي او خطيبك لازم تحسسيها انها الكل في الكل وانها مسيطره وان اكلها احلي اكل وان جوزك دايما بيشكر في اكلها وانك بتتعلمي منها .

2- حاولي دايما تفتحي مواضيع كلام معاها

الام في الوقت ده بتحب جدا تحس انها محور لكل الي حواليها علشان كدا لازم تحاولي تفتحي مواضيع جديده باساليب جديدده في الحاجات الي هي بتحبها طبعا وبتقدر تتكلم فيها وتبين شطارتها  وطبعا وهي بتتكلم اتعلمي تسكتي واياكي تقاطعيها .

3- أسألي عنها دايما

مهما حصل من شد وجذب بينك وبينها حددي يوم معين تكوني عندها وتزوريها ويوم تكلميها علي طول وتسألي عن اخبارها وتسمعيها . وطبعا تاخدي ولادك معاكي وتخليها تفرح بيهم وتزرعي في ولادك الفرح وهما رايحين يزوروها ومفيش مانع من ترتيب يوم وتروحوا فيها لنادي مع بعض وتخرجيها كمان.

4- خليها تثق فيك

يعني لما تحكي حاجه او تشتكي اياكي تطلعي كلامها بره بالعكس خليها تحس انك بير غووويط  .

5- اتكلمي عن مميزات زواجك

اكثر حاجه ممكن توجع اي ام انها تحس ان ابنها مقصر في حاجه او بيته ناقصه اي حاجه او مراته حتي متضايقه فتفادي انك تتكلمي عن اي مشاكل في بيتك بيتك ليكي ولجوزك وبس دايما اتكلمي انها ربيته صح وانك اسعد واحد بدخولك في العائله دي وان حتي لو في مشاكل فانتوا بتعدوها علشان هي بتدعيلك .

6- الهدايا في المناسبات

احرصي علي ان تقدمي لحماتك الهدايه في اعياد ميلادها وافتكريه ومش لازم هديه وبس حاولي يكون ليك لافته بانك تلمي العائله وتعملي عيد ميلاد بمصاحبة اخوات جوزك او خطيبك طبعا ومش هوصيكي بهديه محترمه .

7- حسسيها دايما بأهميتها

زي انك تشريكيها في اسم اولادك واختيار المدرسة واسلوب التربية والاكله المناسبة ليوم عيد جوازك مثلا او للعيد .وازاي بتعمل الاكله الفلانيه او البيتزا العلانيه وهكذا ...

8- مش كل حماه لازم تكون وحشه وشريره

متسمعيش كلام كل واحده تقولك ان حماتها عاملالها مشاكل وتبدئي تتعامل علي هذا الاساس من اول يوم بالعكس ممكن تكون حماتك طيبه جدا والنوع الثاني مش بيكون عايز حاجه غير انها تحس ان ابنها لسه ابنها مش جوزك وهي مش مهمه وبقت علي الرف ودرجه ثانيه علشان كدا شطارتك انك تعرفي توصليلها وتقدري تتعاملي معاها.
" بقلم هاجر عيسى "